بقلم :
هشام زكريا
ـ الحقيقة إحنا اكتر بلد في الجمهورية بتطلع اشاعات ، وللاسف اذا اعتبرنا إن الاشاعات في منطق بعض الدول احد وسائل الحروب ، وتم تطويرها من جيل إلى جيل ، فإننا داخل الإسماعيلية نستخدمها على الفاضي والمليان وكمان في ناس بتحط التاتش بتاعها وبتذوقه وتروق عليه !!
ـ منذ بدء الحديث عن الانتخابات القادمه ، ولأن الشيوخ على الأبواب ، في كل شارع ومقهي ، وفي كل مكان واتجاه ، اسماء وتصورات وحودايت وخيال ، بعيدا حتى عن فكرة الاجتهاد ، ده غير أن كل واحد بيعمل كده ، عنده اهداف واغراض ، يضرب فلان في علان ، بيكره فلان ، عايز يقعد ويحط رجل على رجل ويقولك مش انا قلت لك ، مش انا فهمتك ، أنت مش فاهم حاجه .
ـ وعندما حاولت ان اختصر معكم وعنكم كم الاشاعات وضرب الودع ، والفهلوه المقصودة والغير مقصودة ، ووضعت تصورات شبه يوميه عن الأسماء المهمة ، والأسماء اللي ممكن تكون مطروحه ، والأسماء اللي عندها فرصه بحكم السيرة الذاتية ورؤية اصحاب القرار ، خرج علينا نماذج من الذباب الإلكتروني ، ألحق اصله قابض ، قابض من مين حضرتك وأصلا 90% منهم لا اعرفهم ولا يعرفوني .
ـ لو شاهدت خد قاعد عند حد او حتى بيزوره ، الحق يا عم ، ده فلان بيدعم فلان ، على اعتبار أن من يضع خريطه الأسماء وبالقاهرة وحط تحت القاهرة مليون خط ، مستني فلان يدعم فلان أو يفرض فلان .
ـ كفاية اشاعات ، عشان محتاجين نشتغل شويه ، محتاجين نحترم عقول بعض ، محتاجين نؤكد أن المساحه مفتوحه للجميع واللي عايز ينزل ينزل ، واللي مش عارف يقول مش عارف ، تقريبا كده لغاية ساعة متأخرة من أمس اتعمل 200 اسم للمرشحين لقوائم الشيوخ بالإسماعيلية .
ـ الحمد لله دائما بنشتغل على علم واستنتاج نابع من قوة الشخص وموقعه وسيرته الذاتيه ، لأنه في النهاية لا يهمني شخصيا ، مين قادم ومين غادر ، ومين نازل ومين طالع ..
ـ بس كلمه أخيرة ، راجعوا أخر ما كتبت عن الشيوخ وبدون اشاعات تقريبا لو في 3 مرشحين عندي 2 صح بالاستنتاج والتوقع والدراسة ، مش بالإشاعات والفهلوة وشغل زمان … ارجوكم ” الفيرجن ” اتحدث ، ومفيش حد لسه شغال بنوكيا !!
صباحكم وعي #وأول_فنجان_قهوة