بقلم : هشام زكريا
في الغالب لن نرضى ولن نقبل حتى لو جاء كوكب تاني ورشح نفسه على الأرض ، عارفين ليه لأننا لا نملك قواعد ومنطق في الحياة ، لأن وعينا في التعامل مع أنفسنا وما حولنا ، في الغالب تحركه الأهواء والعواطف وغيره كثير.
ـ معيار اختيار النواب عندنا ، أنه يكون رجل شارع ، ولو سألت يعني ايه رجل شارع ، هيقولك يكون معانا في همنا وشايل حملنا ، طيب وايه همك وازاي يشيل حملكم ، هتجد اجابات سطحيه لا محل لها من الإعراب .
ـ لو اخترت من القديم ، أو حتى من له عمل على الأرض ، هيقولك ياه تاني ، هي ناقصه نفس الوجوه ، مش هنقخلص منهم ونستريح ، طيب لو اخدت حد منهم ، من نفس الدائرة اللي بتعترض ، هيقولك مش لاقيين غير ده ، وهيطلع له أو هتطلع له أو لها مليون تسجيل وصور وأفلام وغيره كثير.
ـ لو جبت حد جديد ، يقولك يا عم مين ده ولا مين دي ، لا عمرنا شفنا ولا عندهم سيرة ذاتيه ، رغم أن اختيار الجديد لازم يخضع لحاجات كتير ، أهمها قدرته على صناعة الفارق ويبدأ ويشتغل.
ـ لو جبت رجل أعمال ، هيقولك يا عم هي ناقصه ، دي ناس عايشه في كوكب تاني ومتعرفش حاجه عن الناس ، ولو جبت حد منهم ومن نفس القماشه ، هيقولك بعد اسبوعين اهو غير العربية والعيشة ارتاحت والسرقه بدأت ، وهيدخل في مليون قضية سرقة أراضي وغيره كثير .
ـالمصيبة اللي اكثر من يتكلم ، لم يدخل أصلا انتخابات الفصل في المدرسة ، ويمكن كمان ، اصلا منزلش انتخابات ، لانه كان نايم والانتخابات بتخلص الساعة 5 وهو كائن ليلي مش نهاري.
ـالتغير علم وهندسة مجتمعات ، ثقافة وتعليم ووعي واحزاب تعمل ،ومجتمع مدني ناضج ، وتأهيل شباب وحاجات كتير ،
فاكرين قصة جحا وحماره ..للأسف بتتكرر كل مرة في موسم الانتخابات على الفيس بوك ، ستظل صالحه طول الوقت .
صباحكم وعي #وأول_فنجان_قهوة