بقلم : هشام زكريا
في عام 2012 تم اختياري من قبل مجلس إدارة النادي الإسماعيلي رئيسا للمركز الإعلامي ورئيسا لتحرير الموقع الرسمي ، ومع الساعات الأولى من عملي ، بدأت منتديات الكوره تكتب ، يعني رايحين تجيبوا واحد من القاهرة ، وده اصلا من مصر ، والحقيقة كنت متضايق جدا ، وعايز ارد عليهم وانزل شهادة الميلاد ، ووقتها لم تكن مميكنه لسه ،كانت عباره عن شهادة كرتونيه كبيرة عشان اقولهم أني مواليد حارة الشافعي والكرنك بالمحطة الجديدة .
ـ المهم قررت بعد فترة من التوهان والمتابعة لكل ما يكتب ، أن اركز في الشغل ، وقفلت خالص على المنتديات ، ولم أتابعها اي شئ يكتب ، سوى مزيد من العمل واستطعت بحمد الله وفضله وبجهد فريق العمل ، أن نعمل نقله للإعلام والموقع الرسمي في أقل من 3 شهور ، وتركت بعدها النادي وسافرت خارج مصر في زيارة لمكان كبير وشغل أكبر .
ـ الناس في بلدنا مشغولين بحاجات غريبه جدا ، مش مهتمين أنت هتعمل أيه ، أو ممكن تقدم آيه ، لو حد نجح على طول ده نجح بالواسطه او عشان كذا ، ومفيش ما يمنع من تاريخه وتاريخ اللي جابوا اهله ، رغم أنها أغلبها معلومات مضروبه .
كان استاذنا الكبير رحمه الله ـ فؤاد طلبه ـ أحد قامات الإسماعيلية في القصة والروايه ، في آخر أيامه يقول لي : احسن حاجه الآن الشرنقه ، أنك تبعد عن الناس والدنيا كلها ، وتقفل على نفسك ، كنت اعترض بشده ، واطلب منه النزول عشان الناس والشباب يستفيد من علمه ، وللأسف اول مره خرج معي لعمل لقاء في التلفزيون ، شتمه أحد الكبار وأتهمه بأنه كذا وكذا ، فحاولت أن اعالج الأمر بعدها بسنوات وطلبته في ندوة داخل مدرسة الإسماعيلية الثانويه وقتها ـ حتى يحدث الأولاد عن تاريخ الإسماعيلية وأبطالها وغيره ، ونزل يمكن للمرة الثانيه من سنوات ، واتكلم مع الأولاد ورجع تاني جري لشرنقته .
ـ نحن لا يعجبنا العجب ولا حتى الصيام في رجب ، عايزين الدنيا تمشي وفقا لأهوائنا ومزاجنا ومصالحنا ، أنت إما معي او ضدي ، فكره أنك تكون صاحب موقف ، أو رأي مرفوض تماما ، وبعدها تسمع ما لا تتوقعه ، هو اصلا ياعم مش صحفي ، هو عايز مش عارف أيه ، إلخ.
ـ قاعده مهمة جدا تعلمتها ، اشتغل ، واشتغل ، واشتغل …لازم يكون عندك إيمان بما تفعله ، ولا تلتفت لمن هم حولك ، في ناس كتير مش عايزك تنجح ، عشان مصالحهم ، وعشان أيضا لم يتعودوا على المناخ النظيف ، لازم نعيش في مستنقع ومؤمرات وكلام وكراهيه وضرب من فوق وتحت الحزام …
فقط ثق أن الله لا يضيع أجر من أحسن عملا .. صباحكم وعي
#وأول_فنجان_قهوة