بقلم :
هشام زكريا
ـ في سنة 98 كنت راجع بشكل نهائي من السعوديه ، فقررت أني أرجع بحرا عن طريق رحلة العباره ، نركب سفينه بئاااا ونعيش أجواء البحر ، ويبدو أن من كتر ما كنا بنشوف افلام اجنبيه فقدنا البصر والبصيرة عن الرحلات البحريه من .. إلى.
ـ المهم استشرت العديد من الاصدقاء ، خاصة واللي بيكون راجع من الخليج بيكون معاه أشياء كثيرة ، لو معاك اسرتك ، بيكون تقريبا بيت كامل بترجع بيه ، اغلبهم قال تمام ورحله حلوه ، والبعض قال : كويسه عشان الوزن والعديد من الآراء .
ـ توكلت على الله ولأني وطني حجزت العباره السلام مش عارف 1 ولا 2 المهم انها مصريه وادارة مصريه والرحله من ضبا إلى سفاجا البحر الأحمر مصر ، وشحنت كل حاجه وركبت الباص ووصلت للعباره بعد رحله طويله من الرياض .
ـ المهم رغم اني حاجز لي ولأولادي كابينه خاصه وبكامل المواصفات ودافع كل المطلوب على أعلى مستوى ، اكتشفت أن اصلا وانا داخل العباره مفيش حاجه اسمها كابينه خاصه ، بالظبط كده زي ماتفتح السوق مرة واحده واللي يلحق يلحق !!
ـ المهم تتخانق تقلب الدنيا وتمسك التذاكر وتكلم اي حد ولا اي حد مهتم ، هو كده ، لدرجه لأني كنت باصرخ يا جماعة احنا بتوع الاتوبيس !!
ـ المهم يظهر في هذا الوقت السماسرة ، في ايه يا باشا ( مصريين طبعا ) ، وتبدأ تدفع مبالغ عشان تاخد حقك اللي انت دفعت له ، واخذت كبينه ، ودفعت عشان ادخل المطعم الرئيسي ، وقبل ما انزل من العباره في سفاجا الكل بيطلع على سطح العباره ويندهوا على كل واحد ويرموا له جواز سفره وطبعا ، تتفتح الدنيا مره واحده وكأنك في صراع حلبه ثيران انت وقوتك بئاااا والستات تقع على الارض والأطفال تصرخ . فاحترمت نفسي ودفعت وخرجت من سلم خاص لخارج العباره .
ـ مش عايز اطول عليكم ، واقول اني دفعت كمان عشان اعرف ألم اشيائي ، ودفعت عشان اعدي من الجمارك ، ومن غير بهدلة ، واخدت بيجو دفعت له ثمن تذكرة طائره عشان يوصلني للاسماعيلية ، ورغم ده لما نزل قعد يفرك في ايده عشان ياخد فلوس زيادة … الخ .
عايز اقول ايه :
ـ اني دفعت ثمن رحلة فاخرة على الطائرة بكل اشيائي .
ـ أننا أسوء ما يمكن تصوره في كل حاجه وخاصة الاستغلال .
ـ أنك لا تثق في معلومه من حد ، لان كل من قال عن الرحله كان بيجود ويمكن اصلا عمره ما ركب عباره او رجع بحر !!
ـ تفتكروا هذه الصورة عنا مش معروفه في الخليج ، وأننا كذا وكذا !!
ـ لما تتقمصوا أن حد اهان مصري في اي دولة وعلى فكره ده بيحصل كل يوم هو بس السوشيل ميديا بدأت تنقل ، افتكر ان في مصريين بيعملوا فيك اسوء من كل ده !!
ـ لازم نعيد تقييم كل شئ عشان تكون ( مواطن ) …
عيدكم سعيد #وأول_فنجان_قهوة