بقلم : هشام زكريا
ـ الحقيقة البعض عنده مشكلة في قدراته ، وتمتد إلى وجهة نظره في نفسه ، والعالم المحيط به ، والمشكلة الأكبر لأننا من زمان قوى بعيد عن العلم ، يعني كل حاجه ننظر إليها ، بتكون نظره عشوائيه غير مبنيه على العلم ، أو حتى الواقع ، أو شمول الرؤيا لكل ما هو حولنا ، تقدر تقول من الآخر أن الخلاط ضرب التمني في الواقع ، فخرج لنا فخفخينا من البشر ، لاهم عايشين في الواقع ، ولا مدركين أن التمني حاجه تانيه خالص.
ـ على فكرة المسألة تمتد من الطفوله ، بنعلم الولاد الصغار مفاهيم غلط ، لو سألت اي طفل عايز تطلع ايه ، بسرعة أبوه وامه يردوا قبل حتى الطفل ما يفكر ، يا ظابط ، يا مهندس ، يا دكتور .. وكأن بقية الدنيا ، ولا حاجه .
ـ في علم النفس لو ربيت ابنك على أنه يكون طبيبا هيكون ، لما تصنع له المناخ والحالة وتناديه دائما بدكتور فلان أو علان ، ودربته وجعلته يدرس ابجديات المستقبل ، هيكون مثل ما اردت ، لكننا في الحقيقة ، بنرمي مسميات ، حتى لو كان شكل الطفل يوحي من الصغر أنه هيطلع زعيم عصابه أو متشرد .
ـ المشكلة دي كبيرة عندنا جدا في الحياة والشارع ، اي واحد نزل نظف شارع ، أوعمل شغل خيري ، بإرادته ، عايز يكون نائب برلمان ، ويصرخ ويقولك حقي ، أنا تعبت مع الناس ، رغم أنه بيعمل ده بإرادته ، وممكن كمان يكون خريج معهد القطن ، مع كامل الاحترام للمعهد اللي مش عارف بيخرج ايه بالظبط !!
ـ مفيش حد قادر يفهم امكانياته أولا ويشتغل عليها ، ولا حد قادر يفهم طبيعة المجتمع حوله ، حتى لو المجتمع مش عجبك ، وأنت بتفكر وتدرسه لازم تكون شايفه كويس ، لان هناك فرق كبير بين التمني والواقع .
ـ على العموم في موسم اكل العيش ، كله عايز يكون نائبا في البرلمان ، والاجابه موجوده ، ادافع عن حقوق الناس ، بحب اهلي وبلدي والمجتمع والناس ، واخواتي تلبس وتاكل …
ـ ارجو من السادة المهووسين بالمناصب والألقاب وتداعبهم احلام الثراء ، يتأكدوا أولا من إمكانياتهم ، ويعرفوا حدود اي عمل ، والمسألة لم ولن تكون مجرد احساسك بنفسك ، وشايف نفسك تقدر ، الموضوع اكبر من كده بكتير ، بس هو السؤال اللي محيرني ، خريج معهد القطن ده بيشتغل أيه ؟!!
صباحكم وعي #وأول_فنجان_قهوة