قلت ان الممر وقت عرضه يعتبر حجر في مياه راكده و من وجهه نظري المتواضعه خالص ان الحجر ده حرك المياه فعلا و طلع لنا بعمل اكثر من رائع و يكاد يكون مثالي زي الاختيار .
▪️بيتر ميمي سفاح إخراج و اعماله السابقه كانت تبشر بكده بس هو المره دي تفوق علي نفسه في زوايا التصوير و الرسايل الغير مباشره اللي بيتم تمريرها من خلال الصوره قبل الكلام و استخدام مشاهد حقيقيه لتوثيق مواقف دراميه معينه تم بذكاء شديد و بدون افوره بس وصلك للمطلوب بالظبط عشان محدش يقدر يشكك او يزايد و الاحداث سريعه تخليك متملش ابدا و اخد كاتات في مناطق مفصليه و رغم كده بينقلك من مشهد لمشهد بكل سلاسل .
▪️سيناريو محكم جدا و هيخلي المسلسل ده يعيش مده طويله و الاجمل انه رجعنا لزمن معلمين الكتابه فمصر و الجمال هنا انه في حوارات ثنائيه بسيطه بياخدك باهر دويدار علي لسان الابطال و يكشفلك حقيقه المسأله و ان حكايه الاخوان و حلفائهم من تيارات الاسلام السياسي و التنظيمات الارهابيه مصلحه مش اكتر لا دين و لا سياسه و لا دياولو و ان الفكره كلها سبوبه و سلطه سواء جوه مصر او بره مصر و ده ربط ذكي عشان تبان قدامك الصوره كامله
و الاشاره الي نشأه البطل و الشرير و دورها في اختيارات كل واحد لطريقه كانت مهمه جدا و منين كل واحد كان جايب افكاره و مرجعيته زي المتطرف اللي جاي من الخارج محمل بالفكر الوهابي و طبقه علي ابنه هشام و الارهابي اللي مقدرش ينطق الشهاده لانه علي الباطل و لانه طالب دنيا مش طالب اخره و هكذا .
▪️الانتاج مكلف و مبخلش و وااااضح جدا كم التعاون اللي قدمته وزاره الدفاع و الداخليه عشان مشاهد معينه تطلع بالمصداقيه دي و خصوصا مع الاستعانه بجزء من اعترافات الكلب هشام عشماوي قفلوا باب الجدال و التحوير مع اي حد .
▪️امير كراره بيكتشف نفسه من تاني لانه المره دي بيمثل بجد مش بيتخانق و بيزعق زي عوايده و مفروض يدعي للبطل الشهيد منسي اللي طبيعه شخصيته الثريه ادته مساحه التمثيل دى .
▪️طبعا من اول ما تشوف اسم تامر كروان عالتتر تعرف انك هتسمع شويه مزيكا ترد الروح و هتبكيك كمان
▪️الحقيقه انا سعادتي لا توصف بالعمل ده مش عشان هو بيحكي قصه بطل من ابطالنا بس لا ده كمان لاني بعتبره خطوه اولي حقيقيه في المواجهه الفكريه اللي ياما اتكلمت عنها انا و ناس كتير و دي اللي هتخلص علي الخرفان و دراويشهم و اللي مش منهم بس بيحترموهم و المغيبين و شمامين الكله و ده اللي واجعهم بجد
▪️الاخوان واجعهم اوي انهم بيتعروا يوميا امام الناس كفكر و إرهاب.
▪️واجعهم اوي ان اسيادهم من الاتراك بيتسلموا تسليم اهالى .
▪️اللي واجع البهلول اردوغان بقي ان الاختيار جاء كعاصفه طارت بسببها ورقه التوت اللي كانت ساتره عورته و هو اصلا في وضع حاليا لا يحسد عليه خارجيا و داخليا.
▪️النظام التركي اللي حارقه يا عيني انه صرف مليارات عشان يجملوا تاريخهم الدموي القذر و اللي نقلوا نفسهم فيه من شويه قطاع طرق و حراميه بنو دولتهم من مص دم الممالك و الدول و الشعوب المسلمه اصلا المحيطه بيهم الي بناه الامبراطوريه و حماه الدين بالبكش و الفتاوي المتقيفه و يجي عمل واحد بس بمعلمه يرجعهم للمربع صفر.
▪️مصر لسه بخيرها يا عرر و لسه قوتها الناعمه بخير و راجعه من تاني اما قوتها الخشنه فمنسي و رفاقه في الجيش و الشرطه عرفوكم طعمها كويس .
– الإختيار بيوجع و المنسي حراق لـ م أ حمد نصر الله