بقلم : هشام زكريا
سبحان الله ، اعتدت دائما لما أعمل عمل كبير ، لازم يكون بعده احداث سريعة ، لذلك باخد بالأسباب وانتظر.
ـ كسرت النظارة ، مفيش مشكلة ، البطاريه الخاصة باللاب توب ” ماتت ” ،وماله هشتغل على الموبايل … وهكمل .
ـ قررت طالما أني هلطش بالنظارات القديمه ، ومش هتابع بشكل مباشر الدنيا من خلال اللاب توب ـ ايدي ورجلي وعيني على العالم ـ أني اتابع شويه التلفزيون .
ـ لحسن حظي كانت حفلة آمال ماهر على MBC الحفلة كانت من الهرم ، وعلى الهواء مباشرة وبدون جماهير ، الفكرة رائعة ،وهادئة ومميزة ، بالإضافة إلى أنها تسويق جيد لمصر وللسياحه ، والحقيقة جعلت الواحد ” فريش ” غير آسفا على نظارتي ولاب توبي .
ـ سألت نفسي ، لماذا لا نقدم الخميس والجمعة من كل اسبوع بالإسماعيلية حفلة بنفس الطريقة من خلال المسرح الروماني الموجود على الدائرى ، والله اعلم هو لسه موجود ولا أخده الوبا .
ـ ونقوم بنقلها مباشرة على تلفزيون القنال واذاعة القنال وممكن جدا نتواصل مع اي قناة فضائيه مثل المحور أو دريم أو حتى التلفزيون المصري.
ـ ويكون في كل اسبوع حد من الشباب ، عندنا بنت صغيرة صوتها روعه اسمها أمل منسي ، وعندنا أسماء كثيرة ، وممكن كمان نجيب عمرو حسن شاعر الإسماعيلية اللي مكسر الدنيا في مصر كلها .
ـ الفوائد كثيرة ، جذب النظر للإسماعيلية التي تراجعت كثيرا ، وننشط الإسماعيلية ونقدم وجوه جديدة ، وممكن جدا نجيب رعاية من شركات كتير داخل الإسماعيلية للانفاق على مصاريف الحفل الأسبوعي.
ـ الحقيقة نحتاج للخروج شويه من جو كورونا ، ونجمع الناس ، ونفتح الإسماعيلية بعيدا عن الأرقام اليوميه ومستشفى أبو خلفيه واخبار العزل .
ـ القوى الناعمه ، علاج يا خونا ..بس هو السؤال هنا : هو فين المسرح الروماني ؟ وهل يعلم المسئولون بالإسماعيلية أن عندنا حاجه اسمها المسرح الروماني ، ولا خده الوباااااااااا؟!
صباحكم وعي #وأول_فنجان_قهوة